🌐 PINULONGAN:
⬅️ Balik sa Mga Leksyon

PITO KA TIMAILHAN SA TAWO NGA LUWAS NA

(Cell Lesson Eleven)

1 Juan 5:13 - "Gisulatan ko kamo niini aron kamong tana nga nagtuo sa ngalan sa Anak sa Dios masayod nga kamo may kinabuhing walay kataposan."

Si Apostol Juan misulat ngadto sa mga nagtuo kang Kristo aron sila masayod nga sila aduna na'y kaluwasan (kinabuhi nga walay kataposan). Nagsulat siya aron mawala ang tanang pagduhaduha sa ilang hunahuna ug moabot ang kasigurohan.

Ang atong kaluwasan wala nabasi sa atong pagbati kondili sa Pulong sa Dios nga atong gituohan. Adunay mga timailhan sa tawo nga naluwas na diha ni Kristo. Ang ubang mga timailhan dili siguro dihadiha dayon nga makita apan sa ngadto-ngadto makita gayud kini. Mga timaan kini sa tinuod nga mga Kristohanon:

Mga Timailhan sa Tawo nga Luwas Na ug Anaa Kang Cristo

1️⃣ Ang pagmatuod sa Balaang Espiritu nganhi sa atong Espiritu
Roma 8:16 - "Makaghiusa ang maong Espiritu sa atong espiritu ug magmatuod nga kita mga anak sa Dios."

Sa dihang atong gidawat si Jesus sa atong kinabuhi, the Espiritu sa Dios mipuyo kanato ug nagmatuod sa atong kasingkasing nga kita mga anak sa Dios. Ang resulta mao ang kasigurohan sa atong kinasuloran (Efeso 1:13-14). Nakasiguro ka nga diha ni Cristo ikaw anak na sa Dios, ug walay anak sa Dios nga moadto sa impyerno uban sa Yawa.

💡 Lawom nga Insight para sa Lider: Kini mao ang gitawag ug "Internal Witness." Ang kaluwasan dili lang kay teolohiya sa utok, kondili usa ka lawom ug balaan nga kumpirmasyon sa Espiritu Santo sa sulod sa kasingkasing sa usa ka tawo nga naghatag kaniya og kalinaw taliwala sa pagduhaduha.
2️⃣ Pagkamatinumanon sa mga sugo sa Dios
1 Juan 1:6 - "Kon moingon kita nga nahiusa na kita sa Dios apan nagpuyo gihapon dinha sa kangitngit namakak kita ug wala mag magkinabuhi sumala sa kamatuoran."

1 Juan 2:3-4 - "Kon tumanon nato ang mga sugo sa Dios, mapaniguro nato nga nakaila kita kaniya..."

Daghan ang nagsulti nga sila nahigugma sa Dios pero nagpuyo ug kinabuhi nga masupilon. Ang timailhan sa pagkahiusa sa Dios mao ang “pagkamatinumanon.” Ang pagtuman resulta sa atong relasyon sa Dios. Wala kini nagpasabot nga hingpit na kita, pero ang tinguha sa atong kasingkasing mao ang paglipay sa atong Amahan.

💡 Lawom nga Insight para sa Lider: Ang pagkamatinumanon dili mao ang nagluwas kanato, kondili kini ang nagpamatuod nga kita naluwas na. Ang usa ka tawo nga naluwas aduna na'y bag-ong kabubut-on nga gidirekta sa Espiritu aron mosunod sa Pulong sa Dios uban ang kalipay ug dili ingon nga palas-anon.
3️⃣ Gugma ngadto sa tanang tawo
1 Juan 3:14-15 - "Nasayran nato nga naka latas na kita sa kamatayon ngadto sa kinabuhi, kay gihigugma man nato ang atong isigkatawo..."

Ang timailhan kung ikaw nakalatas na gikan sa kamatayon ngadto sa kinabuhi mao nga aduna kanay paghigugma sa imong isigkatawo (apil ang imong mga kaaway). Ang mando ni Ginoong Jesus paghigugma sa imong mga kaaway mabuhat na nimo (Lukas 6:27; 1 Juan 4:7-8). Mopasaylo kana, mopanalangin, ug mohatag na ug gugma.

💡 Lawom nga Insight para sa Lider: Tungod kay ang Dios mao ang gugma, ang tawo nga natawo pag-usab makabaton gayud ug supernatural nga abilidad sa paghigugma ug pagpasaylo, bisan sa mga tawo nga lisud higugmaon, tungod kay ang gugma sa Dios gibubo na sa iyang kasingkasing pinaagi sa Espiritu Santo (Roma 5:5).
4️⃣ Makanunayon nga pagtubo diha sa Ginoo
1 Pedro 2:2 - "Sama sa mga bata nga masuso, pangandoy kamo sa gatas nga lunsay’ng espirituhanon, aron sa inyong pag inom niini motubo kamo sa inyong kaluwasan."

Sa mga bata nga bag-ong natawo, dili kapugngan ang pagtubo. Ang hinay-hinay apan makanunayon nga pagtubo diha sa Ginoo klaro kaayo nga timailhan nga kita nakadawat na sa gasa sa kinabuhi nga walay kataposan.

💡 Lawom nga Insight para sa Lider: Kung diin gani adunay kinabuhi, aduna gayu'y pagtubo. Ang usa ka tinuod nga magtutuo dili magpabilin nga stagnant o walay kabag-ohan sulod sa daghang katuigan; makita diha kaniya ang kauswagan sa iyang kinabuhi sa pag-ampo, pagsabot sa Biblia, ug pagserbisyo.
5️⃣ Makadungog na sa tingog sa Dios
Juan 10:4 - "...mag-una siya kanila ug ang mga karnero mosunod kaniya, kay nakaila man sila sa iyang tingog."

Ang mga karnero sa Ginoo makadungog ug mosunod sa tingog sa ilang Magbalantay. Ang tinuod nga mga anak sa Dios nga nagbaton na sa Espiritu Santo makadawat na ug mga padayag gikan sa Dios (1 Corinto 2:9-10). Ang tingog sa Espiritu sa ilang kinasuloran kanunay nagadasig, nagatudlo, nagabadlong, ug nagagiya kanila (Roma 8:14; Juan 14:26).

💡 Lawom nga Insight para sa Lider: Ang makadungog sa tingog sa Dios nagpasabot nga duna ka na'y **spiritual sensitivity**. Kon ikaw makabuhat og sala, duna'y kombiksyon (conviction) ug pagbadlong sa sulod nimo nga dili maghatag kanimo og kalinaw hangtod nga dili ka maghinulsol ug mangayo og pasaylo sa Ginoo.
6️⃣ Pagdumot sa Sala ug Paglikay Niini
1 Juan 3:9 - "Ang tawo nga nahimong anak sa Dios dili na magpadayon sa pagpakasala, kay ang kinaiya sa Dios nagpabilin man kaniya; ug tungod kay ang Dios iyang Amahan, dili na siya makahimo pagpuyo sa sala."

Sa wala pa kita maluwas, ang sala normal ug malipayon alang kanato. Apan kung luwas na kita, ang sala mamahimo nang makasakit sa atong kasingkasing tungod kay nasayod kita nga nakasakit kini sa Dios. Ang usa ka luwas nga tawo duna na'y pagdumot sa dautang binuhatan ug naningkamot nga magpuyo sa kaputli.

💡 Lawom nga Insight para sa Lider: Kini nagpasabot ug kauswagan sa kinaiya (change of appetite). Sama sa usa ka karnero nga kon mahulog sa lapok, mobangon ug mang-limpyo sa iyang kaugalingon tungod kay dili niya kinaiya ang lapok. Lahi sa baboy (nga nagrepresentar sa dili luwas) nga malipayon nga maglunang sa lapok sa sala.
7️⃣ Pagbuntog sa Kalibutan ug Pagpabilin sa Pagtuo
1 Juan 5:4 - "Kay ang tanang anak sa Dios nagbuntog sa kalibutan. Ug gibuntog nato ang kalibutan pinaagi sa atong pagtuo."

Ang tawo nga naluwas sa Ginoo nagbaton og lig-on nga paglahutay. Bisan pa man sa mga tintasyon, paggukod, ug mga katarongan sa kalibutan aron siya mobiya sa tinuohan, magpabilin siyang madaogon ug selyado diha sa iyang pagtuo kang Jesu-Cristo hangtod sa katapusan.

💡 Lawom nga Insight para sa Lider: Ang tinuod nga kaluwasan magdala kanato ngadto sa pagkahimong **Overcomer**. Ang mga peke nga magtutuo dali rang mapadpad sa mga balod ug pagsulay sa kalibutan, apan ang tinuod nga anak sa Dios padayon nga nagabarog tungod kay si Cristo nga patukoranan mao ang nagkupot kaniya.

Pagpalalom ug Pagpuyo Diha sa Pulong

🛋️ Paghatag ug Panahon sa Iyang Pulong

Una kita makatuman, kinahanglan makadungog usa kita sa Iyang Pulong. Ang ignorante sa Pulong sa Dios dili gayud makatuman, kay unsa may iyang tumanon kung wala siya makahibalo. Kinahanglan mohatag kitag panahon sa pagbasa, pagtuon, ug pagpaminaw sa Biblia.

🛠️ Pagtuman Unsay Nadunggan

Tama na ba ang pagpaminaw lang sa Pulong sa Dios? Dili. Gitawag ni Ginoong Jesus ang tawo nga nakadungog sa iyang pulong apan wala nagatuman niini nga “buangbuang.” Gitawag kita sa Dios sa pagtuman unsay atong nadungog ug dili sa pagpaminaw lang (Santiago 1:22).

🛡️ Resulta sa Atong Pagkinabuhi

Gahom ug kalig-on ang moabot kanato sa dihang ato nang ikinabuhi ang atong natun-an gikan sa Iyang Pulong. Kung kita nagbuhat niini sa makanunayon gayod (pagpaminaw ug pagtuman), kusgan ug madaugon kita nga mga Cristohanon. Dili matay-og ug matumba sa mga pagsulay sa kinabuhi.

Pag-aplikar sa Kaugalingon

Lima ka kamatuoran nga dapat nato masabtan aron kita maluwas ug mahiusa kang Cristo nga atong Patukoranan:

  1. Tanan kita makasasala (Roma 3:10; 3:23) - Ang bayad sa sala mao ang kamatayon o pagkahimulag sa Dios (Roma 6:23).
  2. Dili kita makaluwas sa atong kaugalingon - Gasa sa Dios ang kaluwasan ug dili nato kini mabayaran ug makuha sa atong mga maayong binuhatan. Madawat lang kini nato diha sa Pagtuo (Efeso 2:8-9; Roma 6:23).
  3. Si Jesu-Cristo lang ang gipadala sa Amahan aron kita maluwas (Juan 3:16) - Si Jesus lang ang mibayad sa atong mga sala didto sa Krus (1 Timoteo 2:6).
  4. Kinahanglan maghinulsol kita sa atong mga sala ug motuo Kaniya (Buhat 3:19) - Ang sala maoy hinungdan nga nahilayo kita sa Dios busa ato kining talikdan ug motuo kita sa gibuhat ni Jesus didto sa Krus aron mabayaran ang tanang sala (Juan 1:12-13).
  5. Ato Siyang dawton sulod sa atong kasing-kasing - Una kita makalakaw diha kang Cristo, dapat ato siyang dawton isip Ginoo (Colosas 2:6-7) aron hatagan kita og katungod nga mahimong anak sa Dios (Juan 1:12-13).

🙏 Pag-ampo

(Giyahe ang mga myembro nga maghinulsol ug modawat kang Cristo isip Ginoo)

"Ginoong Jesus, nangayo ako og pasaylo sa tanan kong mga sala. Gidawat ko Ikaw karon sa akong kasingkasing isip akong Ginoo, Manluluwas, ug personal nga Magbubuot sa akong kinabuhi. Salamat sa Imong libreng gasa nga kaluwasan ug sa kinabuhing walay kataposan. Bag-oha ako ug tabangi ako sa paglakaw diha sa Imong kamatuoran matag adlaw pinaagi sa gahom sa Imong Espiritu Santo. Amen!"

❓ Pag-aplikar nga mga Pangutana: