(Cell Lesson Five)
UNA sa tanan, ang “pagkatawo pag-usab” o “born again” dili grupo o sekta sa relihiyon nga puwede ka mobalhin para mahimong usa ka parti niini. Ang “born again” dili usab pagbag-o sa kaugalingon pinaagi sa tawhanong paningkamot.
Ang “pagkatawo pag-usab” usa ka kasinian diin ang usa ka tawo natawo ngadto sa pamilya sa Dios. Kini nga pagkatawo espirituhanon, minugna sa Espiritu sa Dios. Nag-ingon ang Ginoo, “...ang gianak sa Espiritu, espiritu usab” (Juan 3:6).
Ang pagkatawo pag-usab dili sekta sa relihiyon, dili pagbag-o sa kaugalingon sa tawhanon nga pamaagi, o pagbautismo sa tubig kondili usa ka "espirituhanong kasinatian diin natawo ang usa ka tawo ngadto sa pamilya sa Dios."
Sa Juan 3:3, si Nicodemo, usa ka respetado nga lider sa relihiyon ug eskolar, natingala sa dihang giingnan siya ni Jesus nga kinahanglan siya matawo pag-usab. Kini nagpakita nga bisan unsa pa ka taas ang imong posisyon sa relihiyon, o unsa ka ka maayo sa pagpanalipod sa balaod, kung wala kay espirituhanong pagkatawo gikan sa Espiritu Santo, dili gihapon nimo masabtan o masulod ang Gingharian sa Dios.
Dili ba diay mga anak sa Dios ang tanang tawo sa kalibotan? Atong tan-awon ang giingon sa Pulong sa Dios:
Tanang tawo binuhat sa Dios pero dili tanang tawo mga anak sa Dios. Adunay mga tawo nga anak sa Dios ug adunay mga tawo nga mga anak sa yawa. Duha lang ka klase ang mga tawo sa tibuok kalibotan.
Ang Biblia naghisgot ug duha ka pagkatawo: Ang tawhanon nga pagkatawo ug ang espirituhanon nga pagkatawo. "Ang gianak sa tawo, tawo usab; ug ang gianak sa Espiritu, espiritu usab." (Juan 3:6)
Ang unang pagkatawo nahitabo sa dihang natawo kita sa tago-angkan sa atong inahan. Niining unang pagkatawo, natawo kita uban sa ‘panulondon nga sala’ (Salmo 51:5). Ato kining napanunod kang Adan diin ang iyang sala ug pagkamakasasala napasa ngadto sa tanang kaliwatan (Roma 5:12). Tungod niini, ang kahimtang sa tanang tawo sa kalibotan makasasala ug:
Mao kini ang pinakarason ngano nga miingon si Jesus nga kinahanglan matawo kita pag-usab. Natawo ka nga patay sa espiritu, kinahanglan matawo ka pag-usab aron mabuhi sa espirituhanon nga bahin. Tungod sa sala iya ka sa yawa, mao nga kinahanglan ka matawo pag-usab aron mahimod ug mahiusa sa Amahan sa langit ug mahimong iyang mga anak. Natawo ka nga makasasala kinahanglan matawo ka pag-usab aron mahimong matarong. Tungod sa sala ang imong padulngan kalaglagan, mao nga kinahanglan ka matawo pag-usab aron makabaton ug kasigurohan sa Gingharian sa Dios (Juan 3:3).
Matawo ka pag-usab kung imong ibutang ang imong pagtuo ug pagsalig ngadto kang Jesus para sa kapasayloan sa imong mga sala ug sa kompleto nga pagkahiusa ngadto sa Dios nga Amahan.
Kung ang usa ka tawo motugyan sa iyang kinabuhi ngadto kang Jesus, matawo siya pag-usab ngadto sa pamilya sa Dios. Nag-ingon ang Biblia, “Pinaagi sa pagtuo kamong tanan nahimong mga anak sa Dios sa pakigkahiusa ninyo kang Cristo Jesus” (Galacia 3:26). Pinaagi sa atong pagtuo kang Jesus, nahimo kitang mga anak sa Dios ug ang Dios nahimong ato nang Amahan!
Kini nga bersikulo nag-ingon nga ang pagkatawo pag-usab nagdala og dako nga panag-ilis sa sulod sa kasingkasing sa tawo. Dili na siya sama sa una nga ulipon sa kangitngit ug sala, kondili duna na siyay bag-ong tinguha sa pagpahimutang ug pagpahimuot sa Dios.
Si Apostol Pablo mitawag sa mga Cristohanon sa Corinto nga mga bata pa diha ni Cristo (1 Corinto 3:1). Sa dihang natawo kita niining kalibotana, natawo kita nga mga bata ug dili mga hamtong na dayon. Mao gihapon sa espirituhanon nga bahin.
Sa dihang natawo kita ngadto sa pamilya sa Dios, natawo kita nga mga “bata pa sa Ginoo” ug dili mga “hamtong na sa Ginoo.” Busa human kita matawo ngadto sa pamilya sa Dios, kinahanglan motubo kita ug mohamtong diha ni Cristo. Ang kausaban kinahanglan mosunod human kita maluwas o matawo pag-usab.