(Cell Lesson Nine)
Ang atong pagahisgutan karon usa sa pinakaimportante kaayo nga pagtulon-an sa Biblia: “Nganong gibuhat kita sa Dios?” Unsay plano sa Dios ngadto sa tawo?
Sa dihang gibuhat sa Dios ang mga anghel, mga hayop, mga isda, mga langgam, ug mga tanaman, maayo kini sila sibo sa ilang pagkamugna. Apan the tawo adunay hunahuna sa Dios, ug gihimo siya liwat kaayo sa Dios tungod kay ang Dios balaan man (pero dili siya Dios). Gituyo Niya kini aron makasabot gayod kaniya. “Relasyon” ang unang katuyoan nganong gibuhat sa Dios ang tawo (Marcos 12:28-30).
Ang tawo gihatagan ug awtoridad sa Dios aron maoy magdumala sa tanan Niyang gibuhat. Ang Dios dili makita tungod kay Siya Espiritu, pero pinaagi sa tawo nga Iyang gibuhat sumala sa Iyang panagway, makita Siya. Ang tawo maoy representante dinhi sa yuta sa Dios nga nagpuyo sa langit. Siya maoy “pisikal” nga nagrepresentante sa “espirituhanon” nga Dios. Gawas sa iyang relasyon sa Dios, gitahasan siya nga mag-atiman ug magdumala sa kalibotan.
Ang Dios nagbutang ug duha ka kahoy taliwala sa tanaman sa Eden (Genesis 2:16-17). Ang Iyang katuyoan nganong nagbutang Siya niini nga kahoy mao ang pagsulay sa tawo kung siya motuman ba gayod Kaniya. Dili mapakita ang gugma kung walay kapilian. Kung adunay gugma, adunay pagtuman sa Iyang sugo (Juan 14:15). Gimandoan Niya ang tawo nga dili mokaon sa kahoy nga magdala ug kamatayon.
Mao kini ang Iyang paagi mapakita sa tawo ang Iyang gugma apan nasayod kita nga mihimo ug desisyon si Adan pagsupil sa Dios. Wala siya mailad sa yawa, ang asawa ang nailad (1 Timoteo 2:14). Nakasala gayod si Adan sa Dios. Gihatagan ug tsansa ug panahon si Adan sa Dios nga maghinulsol apan imbis moangkon sa iyang sala, ang Dios ug ang babaye naman hinuon ang iyang gibasol ngano nakabuhat siya niini (Genesis 3:11-12).
Tungod sa sala, gipapahawa sila sa Dios sa hardin sa Eden basin mokaon sila sa “kahoy sa kinabuhi” ug dili na gayod maulian sa ilang kahimtang nga “makasasala” (Genesis 3:22-24). Apan the Dios nagplano gihapon pagluwas sa tawo nga nahulog na sa sala (Genesis 3:15). Ang pagsupil sa Dios ug pagtuman unsay atong gusto makadaot kanato.
Kaniadto wala nila batia ang kaulaw bisan ug hubo sila tungod sa langitnon nga himaya nga nagsinina kanila (Genesis 2:25). Sa dihang sila nakasala, nakita nila ang ilang pagkahubo kay ang ‘himaya’ mipahawa naman gikan kanila (Genesis 3:7). Ang himaya sa Dios nga nagdala ug kalinaw, katagbawan, ug kalipay nawala tungod sa sala ug mipuli ang kaulaw, kahadlok, ug kahaw-ang sa kinabuhi.
Kaniadto sa wala pa sila makasala, maayo ug lalom ang ilang relasyon sa Dios pero karon mahadlok na sila moduol kaniya (Genesis 3:10).
Nahimong tinunglo ang ilang kinabuhi, relasyon, pangita, ug panuigon (Genesis 3:16-19). Nahimong “buwisit” ang kinabuhi sa tawo tungod sa sala. Ang sala nagdala ug dakong kasamok sa tawo.
🛡️ Si Cristo lang ang solusyon aron ang tawo mabalik ngadto sa plano sa Dios!
Dawaton nato si Cristo nganhi sa atong kasingkasing isip Ginoo ug magkinabuhi kita uban kaniya (Colosas 2:6-7). Dili igo nga kita naluwas sa atong mga sala, apan ang importante usab mopadayon kita pagpalalom sa atong pag-ila Kaniya. Mao kini ang unang katuyoan ngano gibuhat kita sa Dios: “Pakig-relasyon Kaniya.”
Gamiton usab nato ang atong awtoridad batok sa sala, sakit, ug sa tanang buhat sa panulay. Hinumduman nato nga gibuhat kita para magdumala sa kalibotan, para magpuyo nga madaogon sa tanang lugar ug sa tanang panahon. Dinha kang Cristo, nahimo kitang mga representante sa Dios dinhi sa yuta aron Siya nga dili makita, makita pinaagi kanato.